مدرسة الحوش الثانوية / لها علينا يد سلفت ودين مستحق

مدرسة الحوش الثانوية / لها علينا يد سلفت ودين مستحق

الكاتب: الطيب شيقوق — منتدى سودانيز أونلاين

المشاركة الافتتاحية

الطيب شيقوق — 12-14-2010، 06:44 PM

من مدرسة البردانة الأولية والدندر الثانوية العامة ثم الحوش الثانوية وعبرها لجامعة الخرطوم.

الحوش هنا ليست حوش بانقا وإنما حوش الشريف حسين الهندي وحوش ود الماحي وأبو قمري وطبقة وود نعمان والرميتاب وأم تريبات و77 والمسلميات الشرقية والغربية ثم حوش البيلاوي و57، تلك المحطة التي أحمل لها الكثير في وجداني عندما لم يكن وقتئذ طريق معبد بين سنار ومدني.

هي حوش الحاج عبد الله والحداد والشكابات والعقدة محطة السكة حديد الشهيرة، والتي صارت أثرًا بعد عين عندما تغير مسار الناس لود مدني ليكون عبر طريق سنار مدني المعبد.

كانت أجمل محطة في حياتي، التقيت فيها بإخوة أعزاء شاءت الأقدار أن يُنقلوا إليها من المناقل، أذكر منهم:

الأخ العشاء عبد الحي العشاء

الأخ الخزين

الأخ أبو عشة البلة

الأخ محمود عوض الكريم من قرية المكاشفي

الأخ جبارة أحمد ناجي

وآخرين لم تسعفني الذاكرة بأسمائهم

أرجو كل من درس في مدرسة الحوش أن يوقّع هنا توقيع حب ووفاء لتلك المؤسسة التي بدأ تشييدها الشريف حسين الهندي وتوقف العمل بها بعد انقلاب مايو 69.

بالنسبة للإخوة الذين ليست لهم عضوية في سودانيز أونلاين يمكنهم إرسال أي مشاركة لديهم عبر البريد الإلكتروني أدناه:

الردود والمداخلات

عماد خليفة — 12-14-2010، 07:14 PM

سلام أستاذنا ود شيقوق، دا تسجيل حضور وصنقيرة شكلها حتكون طويلة في هذا البوست.

اقتباس: والدندر الثانوية العامة

معناها محمد الطيب (أبو حديد) مباريك من الدندر. لك وللأهل بمنطقة الحوش عاطر التحايا.

عماد خليفة — خريج هذه المدرسة العريقة (ود نعمان)

الطيب شيقوق — 07:27 PM

عماد خليفة، يا سلام عليك يا جميل. ود نعمان القرية الجميلة الحاضرة في وجداني برشيدها وشقيقه للأسف نسيت اسمه والأستاذ محمد الطيب، وهؤلاء سلالة الشيخ... برضي نسيتو ذكرني، الذي صلينا في مسجده.

كنت أذهب كل نهاية أسبوع لود نعمان مع الرشيد الرجل الطيب ومسكين وشقيقه. كان الأستاذ محمد الطيب الذي عمل معنا بقريتنا البردانة ثم مدينة الدندر هو السبب لتعلقي بقرية ود نعمان الجميلة المعطرة على الدوام بروحانيات أهلها ناس التقابة والقرآن.

الطيب شيقوق — 07:34 PM

حوش أستاذنا عمر عطية - الروف

حوش مأمون تميم

حوش أستاذ الهادي من الروف

وحوش الأستاذ أحمد مضوي من أبي قمري

الطيب شيقوق — 12-15-2010، 05:20 PM

فوق لحوش أبكر

عماد خليفة — 08:14 PM

اقتباس: ود نعمان القرية الجميلة الحاضرة في وجداني برشيدها وشقيقه...

شكرًا ود شيقوق. تقصد الرشيد وشقيقه معتصم أبناء جدنا المرحوم الشيخ الأستاذ يوسف المجتبى، وهم من سلالة الشيخ الفضل عليه الرحمة مؤسس خلاوي قرية ود نعمان العريقة.

من الأساتذة العلماء الذين مروا على المدرسة أيضًا:

أستاذ النحو (الذي يُعرب الهواء) كما كنا نقول: أستاذ عمر كنجول (قرية الروف)

أستاذ الرياضيات السر طيفور (قرية أم مرحي) على ما أظن

أستاذ الجغرافيا المرحوم إقبال عبد الله حران

أستاذ اللغة الإنجليزية خالد يوسف (خالد ربشة) قرية حاج النور

أستاذ التاريخ العبقري إدريس حماد (الرجل الأنيق)

هذه رشفة ذكريات سريعة، أكيد إقامتي معك ستطول في هذا البوست. تحياتي.

عبد العزيز الفاضلابي — 08:10 PM

اقتباس: الحوش فوووووق

حوش بكري؟

هجو الأقرع — 08:16 PM

شيخ العرب سلام وعظيم احترام، بما أنك ذكرت الغبشان حاج عبد الله، فإني من مواليد تلك الديار الطيبة، غادرتها وعمري عام إلى ديار أهلي بنهر النيل. كان والدي عليه رحمة الله يعمل بالتجارة في تلك الأيام، وسُميت على أهلنا اليعقوباب. التحية لك ولكل خريجي الحوش الثانوية.

الطيب شيقوق — 08:35 PM

الفاضلابي: لا لا، اسمها حوش أبَّكْر (بفتح الألف وبتشديد الباء وتسكين الكاف).

الأخ ود الأقرع: والله غير تقول لي من اسمك بس كان عندي إحساس قوي بأن لديك علاقة بأهلي ناس العزازة مشايخ اليعقوباب، لأن اسم هجو دا لا يوجد إلا هناك، أو يكون من سمى هجو ويعقوب والتوم من تلك المنطقة.

إبراهيم النعمة — 08:47 PM

الله يا ود شيقوق تحياتي لك وعبرك نحيي الأخ عماد وهجو الأقرع والبقية... بصراحة قبل أن تطأ قدمي هذا الحوش العامر كنت أحس أنك تنتمي بصورة ما لذلك الحوش العريق.

أيمن مبارك أبو الحسن — 08:50 PM

اقتباس: حوش مأمون تميم

أحد رجالات التعليم العظماء في السودان، توفي إلى رحمة الله قبل شهرين، رحمه الله وغفر له. التحية إلى أبنائه وأخص منهم صديقي الأخ عبد الله مأمون تميم.

ود شيقوق.. كيفنك يا راجل، فاقدنك كتير بي هناك. بالمناسبة نشطنا ليك العضوية اليوم راجع إيميلك.

يا أخوي قلت الحلاويين. الظاهر عندنا "عقاب" في الحوش.. ورينا يا خي. بالرغم من علاقتي مع عدد من أبناء الحوش لكن لم يأتِ ذكر هذا الموضوع. تحياتي يا حبيب.

عبد العزيز الفاضلابي — 08:50 PM

اقتباس: سمى هجو ويعقوب

بالمناسبة يا الطيب، ناس هجو - الـ من عمارة الشيخ هجو - ديل أصلهم فاضلاب ومنهم إخواننا التوم هجو ويعقوب، وعبد القادر يوسف. الكلام ده عرفتو منهم بعد اتلاقينا هنا في نيويورك. بس المسنوح شرف هجو ما ظنيتو من إندينا.

الطيب شيقوق — 09:08 PM

الأخ إبراهيم النعمة، يا أخي مالك ملهب مشاعري بروينا. صحيح روينا الجميلة من القرى التي سقطت سهوًا، فلا أنسى أخي وصديقي الدكتور مأمون مساعد البيطري فقد كنا معًا طيلة الثلاث سنوات في داخلية الطاحونة.

شكرًا شكرًا ود النعمة، ورغم أني من الدندر لكن ثمة تشابه ما بين أهلنا هناك وأهلنا في ريفي الحوش، ريفي الزعيم عبد الله عبد الله.

كن معي يا العزيز فلا فرق بيني المتخرج من الحوش في أواسط السبعينات وبينكم المتخرج في النصف الثاني من التسعينات.

الطيب شيقوق — 09:23 PM

أيمن، حرام عليك يا أخي، هل تعلم أنو الحلاويين أصلهم في منطقة الحوش وقراها؟ جاييكم هناك وشكرًا على لفتتك الجميلة. عميق ودي ليك يا ابن عمي.

الطيب شيقوق — 09:34 PM

الفاضلابي، حرام عليك قول الفاضلاب أصلهم بهنا مش العكس. هسع جيت ناطي عايز تخمش اليعقوباب مننا؟ ديل صاروا مؤسسة دينية مستقلة إداريًا وروحيًا منا ومنكم - هم لنا بالعشرة ولكم بالتاريخ وبس.

الطيب شيقوق — 09:46 PM

عماد، نعم نعم نعم يطول عمرك - الرشيد ومعتصم أبناء القامة الروحية يوسف المجتبى. يا أخي أنت مبالغة والله.

عماد خليفة — 12-15-2010، 00:05 AM

اقتباس: طيلة الثلاث سنوات في داخلية الطاحونة

يا ود شيقوق يا خي مبالغة، أنت الكنت ساكن لصق السفرة هاهاها... سكنت بالطاحونة لسنتين ارتحلت بعدها لداخلية السوباط. كما درست بأولى طبري وثانية ابن سيناء وثالثة نيوتن.

أها خلينا نختبر ذاكرتك؟؟؟ كان جاري في الصف في السنة الأولى والثانية الأخ حسن الطاهر حماد من أبناء البردانة إن لم تخني الذاكرة. أها قصرت معاك... يا الله عقّب. تحياتي.

الطيب شيقوق — 05:35 AM

ود الخليفة، أما نحن فقد تعلمنا من علماء أجلاء أذكر منهم:

الناظر علي الخليفة من مدينة الكاملين - إنسان عالم في اللغة العربية، ولا أنسى يا ود الخليفة أن الناظر علي الخليفة سألنا مرة قائلًا: هل يمكن تصغير أسماء الإشارة؟ الجماعة كلهم سكتوا متحيرين كيف يمكن تصغير (هذا وذاك وهؤلاء)، ولكن المرحوم الراحل علي الخليفة انبرى قائلًا:

يا ما أُميلح غزلان شدنّ لنا — من هويليائكن الضال والسلم

لاحظ هنا تصغير كلمة هؤلاء، أما الضال والسلم فهي أنواع من النباتات التي كانت تنمو على أرض الجزيرة العربية.

ومن الأساتذة الأجلاء:

الأستاذ أحمد مضوي من أب قمري

أستاذ الرياضيات العالم محمد عثمان

المرحوم الأستاذ العالم الصاوي - من قرية فطيس

أستاذ اللغة الفرنسية - الأستاذ الهادي من الروف أيضًا

أستاذ الفنون الهادي

وأستاذ الجغرافيا عباس الذي كان يحفظ مسدار المطيرق من الألف للياء

أستاذ التاريخ عبد الرحمن - كنا نسميه الحبوبة لأنه كان يروي لنا أحداث الحربين العالميتين الأولى والثانية بأسلوب ممتع وحجائي

الأستاذ المرحوم مصطفى أبو نائب - تربية إسلامية

نواصل.

الطيب شيقوق — 05:47 AM

ود النعمة في انتظارك، أيمن ما تنوم، ود الخليفة:

أنا يا ود الخليفة كنت الطالب الوحيد الذي كان يعرفه جميع الطلاب وكل الأساتذة لأني أتيتهم وأنا متزوج من الثانوية العامة، وكنت مشهورًا وسط الطلاب والأساتذة بـ(الطيب العريس) وما في حد كان بقول لي الطيب بس.

أذكر في عام 1976 شهدت مدارس الجزيرة الثانوية مظاهرات ضخمة ضد حكم نميري، وكان الطلاب يتوقعون أن ترد إشارة من الوزارة بقفل جميع المدارس. وفي أثناء حصة الجغرافيا دخل أحد الفراشين لأستاذ الجغرافيا وسلّمه برقية. قرأ الأستاذ البرقية والتفت للطلاب متسائلًا: من فيكم يعرف فحوى هذه البرقية؟ الجميع ردوا بالقول: قفل المدارس بسبب المظاهرات. رد الأستاذ قائلًا: كذبًا كاذب.

انقروا البرقية فيها شنو يا إخوانا؟ نواصل.

عماد خليفة — 07:25 PM

الأحد والأربعاء أيام السوق، والخير الوفير، وناس الضهاري والصعيد، وقهوة عم عبد الرحيم، ومطعم الأطرش، وحلواني حسن الخليفة، و... و... و... واستديو الذكريات بالحوش (لصاحبه الطيب عباس).

الطيب شيقوق — 07:49 PM

وكمان يا ود الخليفة ما أحلى من أن تشيل كتابك وكبريتك في جيبك، تمشي النمرة المجاورة للطاحونة وتخمش ليك فولات في جيبك من الفول المنسي بعد الحصاد وتتكامل بيهو ضل الكترات الهنااااااك، وتشوف ليك قشات وتخت الفول تحتن وتولع النار وكتابك قدامك تقرا وتقرمش في الفول المحمّس بالنار. يا الله!

دانيا المكي — 09:29 PM

Up, I will be back later.

الطيب شيقوق — 12-16-2010، 09:14 AM

شكرًا يا دانيا.

مسعود — 08:17 PM

عملتُ بها مدرسًا للإنجليزية 1972-1973. أين هم طلابي الآن؟ الوحيد الذي لي به اتصال هو د. الباقر العفيف.

الطيب شيقوق — 08:38 PM

أستاذي مسعود، والله يشرفني أن تكون يا أستاذي بيننا هنا عضوًا في سودانيز - أنتم يا أستاذي هم صنّاع المجد لهذه المؤسسة فقد كانت على الدوام في قائمة الأوائل من مدارس السودان الثانوية.

بالتأكيد عاصرت مولانا مأمون تميم وأحمد مضوي وعمر عطية وعلي الخليفة ومحمد عثمان والراحل المقيم الصاوي وعباس جغرافيا، ومن الطلاب تركاوي ومحمد إبراهيم زروق وموسى العالم والطيب سنهوري، اعتقادي أنك لم تتذكرهم وهذه حال جميع المعلمين، يَعرفون ولا يُعرفون.

أما مرابيح ود اللبيح فأذكر منها الزميل الرائع الجميل عبد الجبار فعبركم أحييه يا أستاذي.

أطيب الأماني — الطيب شيقوق (العريس)

عماد خليفة — 09:15 PM

تعرف يا ود شيقوق كنت ناوي أوجه نداءً لأستاذنا مسعود الذي عرفت منه أنه عمل مدرسًا بهذه المدرسة العريقة لزيارة هذا البوست. يا ريت يا أستاذ مسعود تلقى شوية زمن وتكتب بعض الذكريات.. الطرائف.. إلخ عن تلك الفترة.

هناك أيضًا الأخ الطيب الشيخ عبد الرحمن (قرية ود الماحي) عضو البورد وصاحب كتابات عميقة وساخرة، عاصرناه بمدرسة الحوش. أتمنى أن نراه في هذه المساحة، فللحوش الثانوية كما قال ود شيقوق يد سلفت ودين مستحق. لكما التحايا والود.

الطيب شيقوق — 09:23 PM

الطيب الشيخ؟ دا وين يا عماد؟ عليك الله وعليك الله يا الطيب تعال لينا، فنحن في سياق التوثيق لهذه المؤسسة، تمثل محطة جميلة ورائعة لكل من عاش في رحابها طالبًا أو معلمًا أو مساعدًا لهؤلاء.

الطيب شيقوق — 12-17-2010، 03:25 PM

سعدت جدًا هذا المساء وأنا أتلقى مكالمة من الولايات المتحدة الأمريكية من أخي عمر محمود محمد الذي درس جميع مراحله الدراسية بريفي الحوش وكان طالبًا بهذه المدرسة في بدايات ثمانينيات القرن الماضي.

الأخ عمر محمود من قرية شبونة ريفي الحوش، فهو مثلي من الذين تشبعوا من الفول الذي كان يُزرع على الحواشات المجاورة لمدرسة الحوش الثانوية.

الأخ عمر أصيب بالانكراشة عندما رأى هذا البوست ولم يستطع الدخول لأنه غير عضو معنا في سودانيز، وقد حاول الاتصال عدة مرات بالأخ بكري للحصول على عضوية ليتسنى له المشاركة في هذا البوست التوثيقي لهذه المؤسسة التي أنجبت الكثيرين الذين أسهموا بفكرهم المستنير في إسعاد الإنسانية على المستويين الإقليمي والعالمي.

أناشد الأخ بكري أبو بكر بمنح العضوية للأخ عمر محمود محمد لنسمع منه حكاوي ناس الضهاري عن أولاد البندر.

أطيب الأماني — الطيب العريس

فيصل محمد خليل — 04:40 PM

يا شيقا انتو سايبين الفصول فاضية وتقروا في الحوش؟ — ليه كدا بس

الطيب شيقوق — 05:07 PM

هاااااا المسنوح عشان أهلك قروك في كمبوني يعني؟

لكن والله يا فيصل المدرسة دي كان جنبها حلاوة فول أحلى من فول مزارع كلفورنيا ذاتو. تشيل كتابك وتملأ عبك فول من الحواشات وكبريتك في جيبك - تشوف ضل الكترة السمح وتلقط ليك قشات تخت عليهن الفول وتش تولع الكبريتة تخليهو يقلى كوييييييس وتروح تقرمش وتقرأ، وقت تجيك فكرة تلقاك هرست الكتاب كلو.

خالد المحرب — 06:56 PM

اقتباس: من مدرسة البردانة الأولية والدندر الثانوية العامة ثم الحوش الثانوية وعبرها لجامعة الخرطوم

العريبي يكفيك فخرًا أنك درست في جامعة الخرطوم زمان، قبل ما تكون جامعة خاصة بتقرى بي الدولار، كانت قلعة علمية شامخة.

الطيب شيقوق — 07:08 PM

يطول عمرك يا عشاي. بس قراية الدولار صارت هي الدراسة العصرية يا خالد أخوي، ويكفينا فخر تجغم حفوصة للإنجليزي وإبداعها في إدارة حوار البوستات.

عماد خليفة — 07:11 PM

يا سلام يا ود شيقوق على عمر محمود وعلى ناس شبونة (د. حسين جربة) وناس الشامي عبد الفضيل وأخوه خليفة، وكمان ناس فحل جالس وفحل شايقية وناس الشريف مختار (منير الزبير) وناس الدوحة (د. حمزة بابكر)، يا أخي ديل ناسًا ما بتنسوا.

عبرك نحيي الأخ عمر محمود ونطالب معك السيد المهندس بكري بمنحه العضوية. ويا عمر اكتب إيميل لبكري اطلب العضوية علشان تواصل معانا في هذه الحكاوي. لكما تحياتي.

الطيب شيقوق — 07:39 PM

يا ود الخليفة، عمر متابع البوست دا من قولة تيت، ووالله يتوحوح للمشاركة بس ما قادر - بالمناسبة عمر ود شبونة اتصل بي مرة تانية وبسأل عنك كتير وقال مشتاق ليك وما لامي فيك، عليك الله نزّل رقمك هنا خليهو يكلمك.

معًا لدعوة الأخ بكري أبو بكر لرفع البوست ومنح الأخ عمر العضوية في هذا المنتدى الرائع الذي جمعنا ونحن مشتتون في أرض الله الواسعة.

عماد خليفة — 07:49 PM

سلام ود شيقوق وعمر محمود. يا عمر ليك كميات كبيرة من الاشتياقات. حاليًا أنا ببيركلي كاليفورنيا، تلفوني هو ذاتووو لم يتغير من زمن نيويورك.

نسمع منك. تحياتي.

دانيا المكي — 07:49 PM

سلام أهل البوست. طبعًا مستغربين المدخلني هنا شنو؟ أولاد عمي وأولاد أهلي كلهم درسوا في الحوش لأنه أهل أبوي من أبقمري والعقيدة.

الطيب الشيخ متزوج بنت عمي وهو عضو معانا هنا. عمر شبونة الزول المهذب ما أظن بيتذكرني لأنه آخر مرة شافني كنت طفلة في نيويورك.

بجيكم تاني. ما تتعشموا تسألوني من زول لأني ما بعرف ناس كتار هناك، لكن متابعة البوست مع بابا وهو أكيد حيعرف الناس.

جعفر محي الدين — 08:19 PM

ود شيقوق كبير المسانيح، عيني وقعت على هذا الخيط من كم يوم ونويت أدخله، ليس لأني درست في الحوش ولكن لأني تعرفت على أصدقاء أعزاء درسوا في الحوش ومن الحوش أيام الجامعة.

فقد كان صديقي عمر نور القيوم تميم، وزرت الحوش في أول إجازة لنا في الجامعة والتقيت الأستاذ نور القيوم تميم رحمه الله تعالى، وعرفت منه معدن وأصالة أهل الحوش...

كذلك كان من الزملاء الذين درسوا في الحوش غاندي الأمين من الرميتاب والصحفي الكبير خالد فضل، ومن بعدهم الطيب عبد الكافي.

فعبر هذا الخيط أبعث تحياتي لهؤلاء جميعًا ولجميع أهل الحوش الطيبين.

الطيب شيقوق — 08:41 PM

دانيا بت المكي، أول حاجة هل ناس الضهاري ديل عندهم الاسم السمح دا؟ لالالالالا وحاة الله دا اسم ناس الرياض والطائف، ونمرة 2 اسم بندر عدييييل والبوست يخاطب ناس الضهاري - عاد أفهمك معنى ناس الضهاري دي كيف؟ يا ستي وقعتي وقعة معاك.

أوع بس يكون فيهم عباس الشيخ الوجيه الولد السمح في خلقتو والسمح في طبعو؟ طبعًا لعباس بيكون اشتعل الرأس شيبًا وأحفاد ربما.

دانيا المكي — 08:45 PM

تقصد عباس عمر الشيخ عباس؟ ده ود عمتي.

الطيب شيقوق — 09:13 PM

دانيا، يا سلاااااام والله هو نفسه عباس عمر الشيخ الرجل المهذب الرجل الخلوق الرجل الذي لم أسمع طيلة الثلاث أعوام ربما حتى صوته إلى أن تخرجنا. الأخ عباس كان ذا نبوغ صامت صامت.

وحياتك حييهو وقولي ليهو الطيب العريس مشتاق ليك وبسلم عليك كتيييييير - عباس كان أدبيًا حتى النخاع وكنت أنا هكذا.

شكرًا شكرًا شكرًا دانيا. تحياتي لجميع ناس أب قمري وخاصة أستاذي أحمد مضوي الأستاذ العالم وخفيف الظل.

دانيا المكي — 12-18-2010، 03:35 AM

طالما أنت دفعة عباس يبقى أنا حاناديك عمو الطيب :)

أها ناس الضهاري ديل عندهم اسم الحناكيش ده عشان أمنا ما من هناك خخخخخ، دايمًا بيقولوا لينا كان أمكم كانت من أبقمري هسه كان اسمك كتيرة ولا بنت المنى. خخخخ

رغم أننا ما عشنا في السودان لكن في كل إجازة لازم نمشي أبقمري، وأنا لمن اتزوجت أصريت العقد يكون بيت جد في أبقمري وسط أعمامي وعماتي.

شكلي حاعسكر هنا، أتمنى ما تتضايقوا مني.

الطيب شيقوق — 03:55 AM

يا دانية، طوالي إنها تهمة لا أنكرها وشرف لا أدعيه يا دانية بتي.

ههههههههها ما عندك مشكلة طالما أنت لا لامّة في ناس البندر ولا راضية بناس الضهاري، تخليك مع طائفة البدون سااااي.

يا أخي أنت بندرية المظهر وضهارية الوجدان = وكدا ممكن تترشحي عديل كمان في دوائر ناس الضهاري.

يا ريت عشان باسمك السمح دا بتبقى للبوست تلال ههههههههها. تعرفي التلال؟

دانيا المكي — 04:06 AM

هوي يا ناس الضهاري، تلال دي شنو كمان؟ ما كتر خيرنا بنعرف عربي؟ هه

أها ناس الضهاري ديل اتربوا في نيويورك وواشنطن، ضهاري قشرة ساي ههههه.

طول عمرنا بيعتبرونا بدون ناس الضهاري، إلا جدي الله يرحمه لمن كنا نمشي ليه بيطرد أولاد عمتنا ويقول ليهم أهل الطيب جو، الزراع برة.

الطيب شيقوق — 04:55 AM

دانية، جدكم بيقول أهل الطيب جوا ولا تقصدي بقول أهل العوض أكّالين البيتزا والآيسكريم جوا؟

دانيا المكي — 05:06 AM

سوري أهل الطين، غلطة مطبعية.

الطيب شيقوق — 05:16 AM

طين شنو؟ جدك بيقصد أهل الحواشات والجروف دانية؟ ولا بقصد (وإن شاء الله ما تكون دي) السجمانين جوا؟

ناس الضهاري وقت يعصبوا بيقول ليك هسع بملأ خشمك طين - يعني أبطش بك بطشًا.

لما تمشي الإجازة في أب قمري بيكون معاك مترجم؟ بالله عباس لسه بخنفس شعرو الزمان ولا عمل صلعة؟

دانيا المكي — 05:23 AM

الحواشات والجروف، لأنه أبونا كان الولد الوحيد والباقيين بنات.

عباس ده أنا من كنت طفلة وشفته بصلعته دي، يوم واحد ما شفت ليه شعر ههههه. اتخيل لسع ما اتزوج؟

أنا وأخوي البعدي طوالي ما احتجنا مترجمين، لكن إخواننا الصغار بيتعبوا تعب شديد لو مشوا من غيرنا.

عبد الرحيم إبراهيم العبيد — 07:53 AM

مولانا الطيب، تحياتي.

كان عمي يعمل بمشروع الجزيرة بالمراجعة الداخلية ويسكن سابع دليب، وكنت في الإجازات أذهب إليه وأجوب تلك المناطق الجميلة معه، وكان له أصدقاء كثر بحوش أبكر، وكان يعمل بمكتب الحاج عبد الله.

عمنا حمزة (أعظم لاعب كرة قدم شاهدته) في تلك الفترة رفض اللعب في مدني ناهيك عن الخرطوم.

لكم ولجميع أهل المنطقة التحايا، وأيضًا تحياتي للأخ علي عبد الرحمن من أم تيربات، ورحم الله الشريف حسين الهندي ابن المنطقة وابن عموم أهل السودان. ودمتم بألف خير وعافية.

الطيب شيقوق — 08:29 AM

دانية:

هيييييييع حظكم يكون خمش ليكم الطين كلو تعصيبًا.

يا سلام والله بس هو صغير، دفعتنا كلهم صغار لسع ما فات فيهم فوات ههههههها.

أوع تأكلوهم الويكة والفسيخ لأنهم ديل بقولوا ليك how it comes the expiry period of this faseek is due، المساكين ما عارفين الفسيخ بيحلى أكتر بعد تنتهي مدة صلاحيتو.

الطيب شيقوق — 08:43 AM

يا سلام يا سابع دليب، يا سلام يا الشريف الدسيس، ويا سلام يا البرياب والشكابات والحاج عبد الله والحداد والبيلاوي وود الماحي.

تسلم تسلم يا ود العبيد لك مني عميق امتناني.

الطيب شيقوق — 08:48 AM

أخي العزيز جعفر محي الدين، تسلم يا جعفر الله يخليك. والله يا مسنوح مداخلتك السمحة دي لم أرها إلا في هذه اللحظة فلك العتبى لك العتبى.

الطيب شيقوق — 08:55 AM

الأخ عماد ود الخليفة، يبدو أن البوست دا حرك أحاسيس ومشاعر الكثيرين ممن درسوا في تلك المؤسسة العريقة - الكثيرون الذين لم تكن لهم عضوية في سودانيز اتصلوا هاتفيًا من جميع أنحاء العالم يطالبون بالاستمرار فيه وجعله دائمًا في المقدمة.

قبل قليل اتصل بي صديقك رجل الأعمال خريج مدرسة الحوش ومن قرية ود نعمان الأخ الكريم عبد الرحيم عبد المنعم، يغريك أنت شخصيًا مطامير من التحايا وبحور من الأشواق. ودي.

أسامة خليفة — 08:51 AM

ود شيقوق، عماد خليفة، إبراهيم النعمة، ودانيا والإخوة المتداخلين الكرام.. سلام.

والتحية ليك يا ود شيقوق على فتح تلك النافذة لحوش أبكر وحوش الشريف وود الحميد..

أنا من خريجي تلك المدرسة أيام عمر عطية وعمر كنجول والهادي علي بابكر وأستاذ إقبال والهندي أبو زيد وعثمان هاشم ومحمد الطيب البشير، نحن جينا بعد إدارة الخليفة وسبقنا أيضًا أستاذ الرياضيات الشهير السر طيفور.. ولي عودة.

الطيب شيقوق — 09:02 AM

أخي أسامة ود الخليفة، يا سلام عليك وعلى تلك الكوكبة من الأساتذة الأجلاء الذين صنعوا رجالًا أسهموا في بناء مجد هذا الوطن الجريح.

أرجو منك ومن جميع من يتداخل هنا كتابة تلفونه والبريد الإلكتروني ليتسنى للزملاء وهم في الشتات التواصل معكم. كما أرجو أن يبين أي واحد منكم أين هو الآن وفي أي مجال يعمل. ودي.

عماد خليفة — 09:26 AM

يا سلام يا ود شقوق فعلًا البوست بحرك الذكريات وبهيج مشاعر الصداقات القديمة. تحدث معي اليوم عمر محمود حديثًا طويلًا استرجعنا خلاله الكثير من الزملاء والأصدقاء. التحايا عبرك للأخ عبد الرحيم عبد المنعم ولكل أصدقاء ذلك الزمن النضير.

أسامة خليفة — 10:01 AM

لدي بعض الصور الحديثة من الحوش علّني أستطع أن أرفعها.. فإن لم أستطع سأرسلها لك عبر إيميلك..

عنواني: ماليزيا.. كوالالمبور، أعمل في مجال السياحة..

الطيب شيقوق — 10:03 AM

يا عمدة، صحيح حرك الذكريات وأهاج المشاعر. بالمناسبة عبد الرحيم عبد المنعم وعدني بإرسال صور لمدرسة الحوش ولقطات لصور جماعية في مدرسة الحوش وأنا الآن في انتظاره.

يا عمدة ما تنزل لينا أغنية الذكريات لعثمان الشفيع خلي الجماعة يبكوا.

الطيب شيقوق — 10:10 AM

هذا هو الرجل العملاق والشامخ الذي وجّه ببناء مدرسة الحوش الثانوية لتكون مدرسة متكاملة بشكل هندسي يأخذ عبارة ENGLAND، بدأ المهندسون بالجانب الذي يمثل حرف الـE ولكن وللأسف الشديد جاء انقلاب مايو وبعده تم وأد الفكرة طالما يُحسب الإنجاز لخصمها اللدود الشريف حسين الهندي صاحب المبادئ العشرة..

التحايا عبر هذا البوست لكل رواد الحزب الاتحادي الديمقراطي ولقلعة النضال مدينة الحوش وأريافها.

التحايا أيضًا لإخوتي وزملاء دفعتي النجباء:

العشاء عبد الحي العشاء، الخزين علي الخزين، فضل الله علي، الشفيع، محمد عمر الشريف، جبارة أحمد ناجي، مأمون عوض الكريم، محمد أحمد علي، قريضة، مأمون البيطري، الخير طبقة، عصام العيدروس، سيف، محجوب الشاطر داك.

عثمان الحسن أبوروف — 12-30-2010، 08:02 AM

يا شيخ العرب أنا عايز من مرابيع ود اللبيح. أجدادي أهل معزة بنت اللبيح اللحوية والدة كل من جدي المرضي ومالك والعجبة وأحمد شلبي.

الطيب شيقوق — 11:44 AM

فوق لحدي أم تريبات.

الطيب شيقوق — 12:14 PM

أستاذنا بشير الخالدي، الطاحوووووووووونة.

الطيب شيقوق — 02:16 PM

عماد ود الخليفة، وصلتني الصورة الفي اللنك أدناه من الأخ أسامة الخليفة مشكورًا. الصورة عن الشفخانة البيطرية بود نعمان. شاهدوا ما آلت إليه تلك المؤسسة. غلبني أحمل الصورة، يمكن لأي من الأعضاء التفتيحيين إجراء اللازم حيالها.

الطيب شيقوق — 03:31 PM

عماد الخليفة، سلام. يا أخي أنت ما شاء الله عندك ذاكرة نمسك الخشب بس.

اتصل فيني قبل قليل الأخ نبيل الطيب عباس الذي فوجئت بأنه يعمل معي في مسقط - سلطنة عمان. الأخ نبيل كان متابعًا بوست الحوش ووجد مداخلتك التي أشرت فيها إلى العم الطيب عباس والد نبيل وصاحب استديو الذكريات بمدينة الحوش. الأخ نبيل يرسل لك أحر التحايا ولجميع الإخوة والأخوات المتداخلين/ات.

أسامة خليفة — 03:35 PM

العزيز ود شيقوق، الصورة التي أرسلتها لك ولم أستطع تحميلها من جهازي للشفخانة البيطرية للحوش من الجهة الجنوبية الغربية لمدخل أبو قمري وود نعمان والحلة الجديدة...

أيضًا ارتبط حديثًا اسم مدينة الحوش بلاعب الهلال الراحل والي الدين محمد عبد الله وشُيّد له استاد باسمه الآن..

الحوش «حواشات» كما يحلو أن نناديها سابقًا، كانت مدينة مميزة وهادئة قبل العهد الإنقاذي..

الحوش الثانوية وأولاد شبونة الشطار والجادين دايمًا ناس الطيب أبو زيد وعمر عبد الفضيل، والدوحة ومعنا هنا في ماليزيا د. عادل الشيخ والآن يعمل بدولة بروناي دار السلام..

الشريف مختار والقصيراب وود الماحي، أسماء كثيرة ضايعة ولكن سأحاول استعادة جزء منها..

أولاد أبو قمري ما كانوا بسكنوا الداخلية لقرب المنطقة.. نجم الدين عمر الشيخ، سيف اليزل عبد الله بانقا، هجو رجب، ياسر تاج الدين المرضي...

شكرًا ود شيقوق وسنحاول معك اجترار تلك الأيام الجميلة وأساتذة وزملاء ذاك الزمن الجميل.. لي عودة ولدي عدد مهول من الصور ولكن لم أستطع تنزيلها.

الطيب شيقوق — 03:46 PM

ألف مرحب أخي أسامة الخليفة وألف شكر لك مرة ثانية وأنت تحضرني بعدد من القرى التي سقطت سهوًا، وما زالت كثير من القرى غائبة عن الذاكرة ولكنها ستعود كما عادت إلى الآن: أبو سقرة قرية صديقي آدم، والدنيقيلة والمسلمية مناها وقرية أخي الشمباتي بانقا، ما عارف كان بلبس نظارات فهل لسع ولا فقد النظر خالص ربنا يمد في أيامه.

طبعًا معنا هنا في عمان مجموعة محترمة من خريجي الحوش أذكر منهم:

دكتور فتح الرحمن أشهر طبيب أسنان في السلطنة

والأخ أبو نائب أشهر موظفي الطيران في الطيران السعودي بمطار مسقط

والأخ خالد الذي يعمل بالسفارة السودانية بمسقط

الأخ أسامة، حاولت أحمل الشفخانة البيطرية لكني لم أستطع، وأنت عارف ناس الضهاري ما شداد على الحاجات دي. حاول لو أمكن تحميلها هنا. ويا ريت تنزلوا لينا أغنية الذكريات.

دانيا المكي — 05:08 PM

نجم الدين عمر الشيخ ولد عمتي هو الآن بروفيسور لغة فرنسية وشغال في جامعة الإمارات في العين. سيف بانقا طبيب في الخرطوم آخر عهدي بيه قبل سنتين. ياسر تاج الدين ولد عمي وهو معانا في أمريكا فرجينيا.

الطيب شيقوق — 07:13 PM

دانية، يطول عمرك على هذا الحضور الذي أضفى على البوست طعمًا متميزًا. ناس أب قمري فوووووق. ابقوا معنا فأنا موعود بكثير من الصور التذكارية من الأخ العزيز عبد الرحيم عبد المنعم من السودان.

الطيب شيقوق — 07:29 PM

يا ناس الضهاري المشيتو أمريكا الحقوني سريع، جاتني صور تذكارية من مدرسة الحوش وطلاب الحوش من الأخ العزيز الوفي عبد الرحيم عبد المنعم وغلبني أحملها في البوست. الحقوني تقنيًا ما تبقوا ناس بيتزا وكنتاكي وكدا.

أرسلوا إيميلاتكم عشان أعمل ليكم فورورد وتنزلوا الصور، أنا باقي زول ضهاري ساي وفي الضهاري زول كتر ولعوت ساكت.

الصور تقول الآتي:

صورة تذكارية لجمعية الفنون

وقوف من اليمين:

الطيب عوض الله (قرية الرانجوك)

عثمان أحمد عثمان (الحوش)

الرشيد النور (قرية أم حمراء)

عمر عبد الرحمن البرتو (أم دقرسي)

الطيب أحمد حسن (الحوش)

جلوس من اليمين:

شخصي الضعيف عبد الرحيم عبد المنعم (قرية ود نعمان)

شقيق الطيب أحمد حسن

الأستاذ المحترم الهندي محمد أبو زيد (قرية روينا) وأستاذ مادة الفنون

محمد الخاتم مأمون تميم (الحوش)

محمد الفاضل النور (قرية أم حمراء)

رضوان محمد المدني (قرية أم حمراء)

محي الدين مرغني برير (الحوش)

الصورة بتاريخ 29\10\1979 باستديو الذكريات — عبد الرحيم عبد المنعم

شكرًا يا عبدو يا عظيم.

دانيا المكي — 07:57 PM

عمو الطيب شكرًا ليك يا راقي. الصورة وين طيب ههه.

الطيب شيقوق — 08:05 PM

إيميلك يا بتي وين؟ عشان أعمل ليك فورورد.

الطيب شيقوق — 08:34 PM

وردتني للتو الرسالة الآتية:

الطيب شيقوق، تحيات طيبات.

حقيقة أحسست بسعادة بالغة أنت توفي الحوش ومدرسة الحوش الثانوية حقها في رد جميل لهذه المدرسة والمنطقة كلها.

حقيقة أنا لم أدرس بالحوش الثانوية وإنما فقط من ريفي الحوش، ويهمني جدًا أن أقرأ عن المنطقة وعن رموز التعليم فيها وعن سيرتها الأولى. وأنا أقرأ لك وللرائع أسامة خليفة أحسست بالعودة لجذوري هناك لكل القرى المحيطة بالحوش والضهاري.

وتذكرت أنكم كنتم تمتطون تلك البكاسي من مدني مثلًا إلى الحوش وتلكم المعاناة خصوصًا في فصل الخريف، وهذه هي ذات المعاناة التي أعاني منها قبل عام تقريبًا في أي زيارة لي للمنطقة.

حاليًا والحمد لله تم افتتاح شارع الزلط الذي يربط مدني بالحوش، وتحديدًا من شارع سنار في منطقة خور ود أبو بالقرب من قرية ود النو إلى الحوش، مرورًا من شارع زلط سنار إلى ود النور والصواردة و77 وود المبارك أم تربيات وأنت ماشي على الحوش.

يعني أزمة المواصلات في الخريف انتهت والحمد لله، والمفروض الشارع دا ينتهي من زمان من زمن الشريف حسين الهندي كان مرشح عن دائرة الحوش في انتخابات 65.

ونحمد الله على كل انتهاء العمل بشارع الزلط ونتمنى أن تهتم محلية الحوش بأمر المدينة لأنو بالجد حالًا ما بيسر، حاليًا ولي زيارات لها خصوصًا في أسواق الأحد والأربعاء.

عندي زيارة في اليومين دي للحلة ولو مشيت حامشي ليك مخصوص للحوش وألتقط ليك بعضًا من الصور عسى أن تعود بكم الذاكرة قليلًا إلى الوراء.

بخصوص المذاكرة والتهام حبات الفول أقول يا حليل مشروع الجزيرة وحليل زراعة الفول السوداني وحسي زراعة العيش غلة المنطقة الرئيسية بقت في مشكلة.

وسوف أعود إليك.

وليد فتح الرحمن — قرية الصواردة

شكرًا أخي فتح الرحمن على هذه الرسالة المعبرة. أتمنى أن تذهب إلى هناك وتوافينا بالصور عن الحوش، تلك المدينة التي يسكننا عشقها يا فتحي.

الطيب شيقوق — 09:23 PM

كتب الأخ العزيز عبد الرحيم عبد المنعم مشكورًا ما يلي:

الإخوان الأعزاء الطيب وعماد وأسامة خليفة، تحياتي وأشواقي لكم أحبائي، هي ذكريات جميلة أرجو المساعدة في رفع الصور وبنعود للنقاش والذكريات. عماد وأسامة رجائي راسلوني على الإيميل.

صورة تذكارية من عنبر الرهد الشرقي (استديو الذكريات بتاريخ 9\2\1980)

جلوس على الأرض:

عبد العزيز إسماعيل (البسابير)

علي ميرغني (الدليبة)

جلوس من اليمين:

عليش أحمد عثمان (ود الماحي)

الشامي يوسف (ود نعمان)

شرف الدين سعيد (الرميتاب)

أحمد عثمان البدوي (الخروع الجديدة)

كمال عمر حسين (حلفا الجديدة)

القاسم إبراهيم (بيضاء)

جلوس أيضًا:

ديفيد بولن (بور)

يوسف عمر يوسف (عسير)

أحمد صديق القريش (الطليح)

جاه الرسول إدريس (الرميتاب)

عمران عمر أحمد (ود مقبول)

عبد الرحيم البشير (فحل)

زكي محمد الحاج (ود مقبول) له الرحمة

وقوف:

بابكر حسب النبي (ود مقبول)

سلستينو واني (جوبا)

عامر مصطفى (الخرطوم امتداد الدرجة الثالثة)

عبود أحمد بابكر (ود النور)

ملوال جوكاك (بور)

جلال الدين الطيب (عمارة البنا)

علي إدريس (الدوحة)

حسن علي محمد (النوراب)

يا ود شيقوق الصورة دي بدقلب المواجع وأنا مخصوص كتبت الاسم والقرية. يا خي خليني أستلف عضويتك وأسكن معاك في البوست ده، وما تنسوا قولوا لبكري أبو بكر يا زول الحقنا. للتواصل أرجو إنزال الإيميل بالبوست.

إنعام عبد الحفيظ — 11:07 PM

هي يااااااا الطيب شيقوق كمان بقيت تراسل خالي؟؟؟ ههههههه

عبد الرحيم عبد المنعم أحمد ركاب دا خالي أخو أمي شقيقها. لنا ذكريات جميلة بود نعمان والحوش والروف، بس ما قرينا في الحوش الثانوية دي. تحياتي وسلامي لعماد وأسامة خليفة.

عماد خليفة — 12-19-2010، 02:52 AM

الغالي ود شيقوق، شكرًا للأخ نبيل الطيب عباس، له وللأسرة الكريمة عاطر التحايا، والتحايا موصولة لعموم الأهل بقرية السوريبة.

وحقيقة استوديو العم المرحوم الطيب عباس كان يشكل أحد معالم المدينة الوديعة في ذلك الزمن، كان رجلًا أنيقًا وفنانًا ومتواضعًا وخلوقًا دائم الابتسام. فالعمل في مجال التصوير إضافة إلى أنه مصدر دخل يوضح أن من يقوم به يمتلك ملكات فنية كبيرة، وذلك ما كان يتمتع به العم المرحوم الطيب عباس: استعدال الجلسات وزوايا التصوير والتناسق كان يجيدها إجادة تامة، إضافة لعلاقاته الاجتماعية المتميزة مع ناس المنطقة جعلت هذا الاستديو من المعالم التي لا يمكن إغفالها.

شكرًا لك يا نبيل ولك تحياتي مجددًا. أتمنى أن تقوم بإنزال صور أخونا عبد الرحيم فهي ستكون خير دليل على ما قلته.

عماد خليفة — 03:16 AM

سلامات يا إنعام ومرحب بيك في رحاب ذكريات الحوش. يعني لو ما خالك ما كان حتشرفي هذا البوست، ولا أكون جابوك الاتحاديين وسيرة الشريف هاهاها.

طبعًا يا ود شيقوق ارتبط المرحوم الشريف حسين الهندي بمنطقة الحوش رباطًا وثيقًا كما تعلم، فهو ابن الدائرة الذي لا يتجرأ أيٌّ كان أن يفكر حتى في النزول منافسًا له في الانتخابات، فكان فوزه بالتزكية، وأيضًا ناس المنطقة أحبوه بشدة فهم الذين حموه بعد انقلاب مايو المشؤوم وهم الذين هرّبوه إلى إثيوبيا. وكانت تسجيلاته الصوتية إبان فترته في المعارضة توزع من الحوش، فالحوش معقل مهم من معاقل الحركة الاتحادية في الجزيرة.

أيضًا درس معنا في الحوش المناضل الرفيق ياسر عرمان نائب الأمين العام للحركة الشعبية لتحرير السودان.

وكمان الأستاذ الموسيقار شمت محمد نور شمت من أبناء الحوش ودرس بهذه المدرسة العريقة، له التحايا ولأسرة الفن والفنون أسرة العم محمد نور شمت.

وبعدين يا ود شيقوق شايفك داير تمرق لينا ناس أبقمري ناس ضهاري، يا أخي ديل ناس حضارة ووجاهة قديمة قدم المنطقة. تحايا للأخت دانيا ولوالدها ولأعمامها عصام عمر الشيخ ولؤي محمد خير وقصي وما ننسى أستاذنا عثمان هاشم، وتحايا لكل ناس أبو قمري (الفقمة، الشليخة وأبو قمري الكبيرة)، ديل يا دانيا لو ما عرفتيهم اسألي أبوك أو ياسر ابن العم تاج الدين المرضي. لكم التحايا والود.

عماد خليفة — 03:31 AM

اتصل الأخ عبد الباقي بابكر من قرية الزناندة مقيم بمدينة دينفر ولاية كلورادو يبعث بتحاياه الشديدة وشكره للأستاذ الطيب شيقوق على هذا البوست وهذا الاحتفاء بالحوش وبمدرسة الحوش. وعبد الباقي درس بمدرسة الحوش وعمل بها وكيلًا لطلمبة شل بالحوش، وتربطه كبقية أهل المنطقة علاقات حميمة مع كل ناس الحوش والقرى المجاورة، وهو عمدة منطقة الحوش بأمريكا، ما إن يسمع بأن هناك أحد أبناء المنطقة قد وصل بلاد العم سام إلا وبادر بالسؤال عن تلفونه وقام بواجب الاتصال.

التحية للأخ عبد الباقي ولناس الزناندات (جبارة وفضل السيد). ورحم الله أستاذنا ابن الزناندة والذي درّس بمدرسة الحوش لفترة طويلة الأستاذ عبد القادر هجو النذير.

تحايا خاصة من عبد الباقي للإخوة أسامة وود النعمة.... أين أنت يا ابن النعمة تعال واصل الحكي.

تحياتي.

الطيب شيقوق — 04:12 AM

إنعام عبد الحفيظ، الليييييييلة الجابك كمان الحوش شنو؟

والله يا إنعام عندك خال حقو تصوريهو تختي صورتو في جدران بيتكم - دا إنسان ما عادي - بعد عملت البوست دا أسمع ليك رنة تلفون من السودان رقم غريب علي - قلت هلو معاي منو؟ قال لي ما بتعرفني لكن جمعني معك حبك للحوش ومدرسة الحوش وناس الحوش وأنا الذي يسكنني عشق الحوش ومدرسة الحوش. اتحدث معاي قرابة الساعة الله يخليهو وعرفت كل تفاصيل حياتو، يعمل رجل أعمال رايق وكدا تاني أكان فلسنا بس عبد الرحيم ود عبد المنعم.

بالله التلوداب جوا لحدي الحوش؟ عشان كدا اتحادية مووووووت.

التحية عبرك مرة أخرى لخالك الوجيه وجميع أهلنا في مدينة الحوش وضواحيها.

الطيب شيقوق — 04:18 AM

عماد، ألف مرحب بأخي العزيز عبد الباقي الفاح عطر كرمو في بوستنا - يطول عمرو أخو الأخوان وعشاء البايتات ومقنع الكاشفات.

أحيي عبره الأخ الزميل والصديق الدكتور البيطري مأمون مساعد من قرية الزناندة. يا أخي وفقًا لمعايير البندراب مدني ذاتها طلعوها ضهاري.

أما عن الراحل المقيم الشريف حسين الهندي فأنقلكم لتصفح هذا اللنك:

http://mash-had.org/Alhindi_Hussien.html

محبتي.

الطيب شيقوق — 06:22 AM

الإخوة والأخوات الكرماء/ات، وردتني للتو المشاركة الآتية من الأخ الزميل بابكر الحسن يقول فيها الآتي:

يا سلام على الحوش وأيام مدرسة الحوش الثانوية، يا سلام على الأساتذة الأجلاء: أستاذنا عمر عطية، الهادي بابكر، المربي الجليل علي الخليفة رحمة الله عليه.

المهم حانكون متابعين معاك على الإيميل لأنني فقدت الباصويرد منذ زمن بعيد لم يرجعها لي الأخ بكري بالرغم من المناشدات الكثيرة... أناشده الآن لإرجاعها. لكن سوف أتابع البوست وأتداخل عن طريق بريدك.

أتمنى من الأخ الطيب الشيخ الدخول وإرسال تلفون الأخ عثمان حامد وعرفت أنه موجود هنا في كندا. كنت أتمنى مشاهدة الصورة لأن الأخ ديفيد بولن معي هنا في نفس المدينة. الكلام كتير وحاواصل.

بابكر موسى إبراهيم الحسن — قرية ود مقبول — الآن كندا ألبرتا مدينة إدمنتون

ألف مرحب بيك أخي بابكر الحسن وسعدنا جدًا وأنت تعطر هذا البوست بتلك المداخلة الجميلة.

يا ريت يا أخوانا فيما لو بيّن لنا كل متداخل الأعوام التي قضاها في مدرسة الحوش وهل هو أدبي ولا علمي.

يا حليل العقاد وابن سينا والطبري ونيوتن. ذكرونا يا إخوانا أسماء الفصول، كبرنا وبقينا نسايين بالحيل.

نناشد الأخ المهندس بكري على إعادة أدوات الدخول للأخ بابكر موسى إبراهيم الحسن.

الطيب شيقوق — 06:28 AM

يا إخوانا الحقوني أدوني أي إيميل بتاع واحد فيكم فنان عشان ينزل الصور التي أرسلها لي الأخ عبد الرحيم عبد المنعم.

دانيا المكي — 06:31 AM

عماد أزيك، قصي ولؤي ديل أولاد خالتي، أمس كنت بتكلم مع لؤي الفنان المرهف ولفت نظره للبوست ده، أصحابي شديد، عصام ولد عمتي. أصلًا أبقمري كلها أهل عشان كده كلنا بنتعارف.

الطيب شيقوق — 06:36 AM

عماد:

اقتباس: وتحايا لكل ناس أبو قمري (الفقمة، الشليخة وأبو قمري الكبيرة)

ههههههههها قال ناس بندر - يا أخي أنا بقول ليك معايير البندرية طلعت حتى ناس مدني ناس ضهاري، تقول لي الفقمة والشليخة وكدا.

الطيب شيقوق — 06:54 AM

اقتباس: أمس كنت بتكلم مع لؤي الفنان المرهف ولفت نظره للبوست ده

تسلمي يا دانية بتي، ذوق حضاري بالحيل يطول عمرك.

عبد العزيز عيسى — 08:09 AM

عزيزنا المستشار المسينيح/ الطيب الطيبوب ولا هي الشيقوق!!

خالص سلام وشوق المشتهي.... بوستك بدا حلو شديد زي وش الملاح، والتشبيه ده واقعي لأني في المطبخ هسي. لقيتك مالي دنيا بي سيرة كاربة.. ات يا اللخو الشي الجايينا قريب استفتاء ما هو انتخابات، وده للجنوبيين بس..

لقيت كمين up up فقلت دي برضو تمرين في الخج.. لكن يا خوي كان بقت صحي انتخابات غير صوتي وصوت فيسل ما تحصل شي...

الحوش، ونعم الحوش بعد الرمية الفوق دي.... وقيل أعلاه. الحوش دي كلما أسمع حروفها دي أسرح مع الجزيرة (ما آلت قطر) وأتذكر الدورة المدرسية بمسرح الجزيرة بمدني.. الباقي بين السطور.. يا لها من أيام روائع!! روعة أهل الحوش والجزيرة.. روعة حوش منه الهندي.. وين للحوش الجاب الهاي..

في مداخلة فوق نادوك بي شيخ العرب.. ودي ما بنعترف ليك بيها إلا لو جات من الشيخ المحرب. تحياتي سعادتك..

الطيب شيقوق — 08:48 AM

الأخ العزيز عبد العزيز الود اللذيذ:

يا سلام عليك ذكرتني أمي يطول عمرها كنت كلو مرة بخليها تغفل وأخمش ليك وش الملاح. زمان ما كنا بنعرف ولا سمعنا بكلوسترولاتكم دي، بنتغم ساي.

أوعاك تسيّس البوست يا مسنوح جنك سياسة.

وصلت طب وفيها عنكوليب طاعم كمان صاح؟

بالله أنت من الزمن داك؟

شيخ المحرب مطلوب من قبل الجنائية الدولية باقي لي وسط عولو زي موسى هلال.

عبد الفتاح أبو شيمة — 09:26 AM

مرّقوك من الضهاري

يا حلالي ويا نهاري

الآدفوكيت قدر دا أدّوه ناري

يا ما جاري فيك اللي جاري

يا مداري

حباب الطيّب الطيّب

افرد لي جناحك حبّب

هبّب لينا جوًا طيب

في جو بورد بقى مغيّب

كلام ما تسمعه الطيّب

غير قولًا ديمة يخيّب

سلام يا... لهذه المدارس في مخيلتي وذاكرتي ذكريات جميلة وزاخرة بكل ما هو جميل وأصيل. إنها مجتمعات الزمن الجميل: بداخلياتها البرحة، وألعابها الفرحة، وطرائفها المرحة.

لِمَ لا تعرج قليلًا إلى الأنشطة الجميلة سواء كانت الرياضية أو الأدبية، زنقات التمام، وعودة الجمعة الحزينة، وفرحة الخميس عند الانطلاق، جلسات المذاكرة، ورحلاتها التي لا تُنسى، مكتباتها ودروسها.

أقول ليك: بوست جميل بس داير دفرة. استثمر الإيميل مع الزملاء في استكتابهم عن ذكرياتهم ويمكن أن ينتج عملًا عظيمًا حسب تجربتي في بوست سابق عن المدارس الوسطى. إنت مسنوح لكن نغششك نعمل شنو، بنحبّك.

الطيب شيقوق — 09:35 AM

أبو شيمة: هلا هلا الليلة س... ليك مولع نار حتجيب لينا الدرر واللآلي.

فيصل محمد خليل — 09:45 AM

حوش في عينك، تاني ما أشوفك بجاي.

الطيب شيقوق — 09:51 AM

يا زول هوى أوع تجي تشاغل بجاي، الناس ديل كلهم ناس ضهاري كلو واحد بارم سكينو وشايل عكازو المضبب كايس ليهو رطاني يجي يقول بغم بس عشان هسع يلحقو أمات طه.

فيصل محمد خليل — 10:00 AM

خلاص حابرم معاكم صلح الحديبية.

الطيب شيقوق — 10:34 AM

بشرط ترسل لي إيميلك على المسنجر عشان أرسل ليك الصور الجاتني عن مدرسة الحوش وما قدرت أنزلها لأسباب فنية وقلة مقدرات عقلية.

هجو الأقرع — 11:05 AM

شوف يا ود شيقوق عشان ما تقول لي كل مرة الاسم ده ما حق الجعليين، أهه أبوي عليه رحمة الله كان عندو تجارة في الغبشان ومع شريك اسمه السفاح، أهه الوالدة رحمة الله عليها كان كل أطفالها بموتوا بعد الولادة، أها قوم جيت أنا، وجيه ووسيم حاجة كده، يا الله فتيات الحوش ديل كلهن آخر جهجة، بس واحدة كده مطموسة قالت ليهن هوى ما تتكسرن ساكت أسع الوليد بموت.

أهه أخوك عاش لي يوم السماية، تقوم جارتنا امرأة عمنا السفاح تقول: شوفي يا بخيتة بت الحسن، الوليد السميح ده سميهو هجو على أبواتي اليعقوباب شوفي أكان يموت.

يا زول الوالدة عليها رحمة الله والوالد ختمية على السكين، المهم نسوان الحلة والمكسرات من البنات أصروا على التسمية، قام أبوي عليه رحمة الله وافق سماني هجو عشان الجماعة يرضوا واستخرج لي شهادة ميلاد باسم ميرغني، قال هجو ده اسم عرب ساكت.

المهم اسم هجو ظهر، وما في زول عارف اسم ميرغني حتى أبوي نسي موضوع الشهادة، قوم يا زول جيت في أول يوم للمدرسة بعد عودة من نهر النيل، المرة دي كانت في شرفت الجاموسي، المهم طبعًا كنا مستنيرين جدًا ومدير المدرسة صاحبنا، عليه رحمة الله اسمه أحمد صالح حلفاوي كان يعرفني بهجو، المهم مشيت مع جارنا العم عثمان علي أحد التجار للمدرسة. شوف غرائب الصدف: فارقت هذا الرجل عام 68 وقابلته العام الماضي في الدوحة عندما زار ابنته هنا، شفت الفلم ده كيف.

المهم المدير لما شاف الشهادة استغرب وكان شديد الهظار معي لما كان يأتي للبيت، قال لي أنت أكيد أحضرت شهادة واحد من إخوانك المتوفين، المهم أنا كنت صغير أخدت لي بكية كده، والجماعة سكّتوني والرجل قام سجلني بهجو باعتبار أن هنالك خطأ. الكلام ده كان في قرية شرفت ريفي المناقل حاجة كده وستين.

المهم كان مدير المدرسة وبقية الموظفين يأتون ليلًا في البيت، قام قال للجماعة عاوزين الشهادة الأصلية، في تلك الفترة كانت الوالدة متوفية عليها رحمة الله - شوف الهملة دي تركتني وعمري عامين - وكنت مع شقيقتي الكبرى في عودة للمرة الثانية للجزيرة، المهم تم إفهام المدير أن هذا الغلام اسمه هجو ولكن في الشهادة اسمو ميرغني، يا زول الحلفاوي قال أنا بعرف هجو، قوم تاني رجعت البلد في نهر النيل حيث الشهادة ولا يحزنون، لما جئت في سادسة امتحنت بميرغني أعمل شنو، أها لما جيت أمتحن الثانوي غيرت الاسم إلى هجو باستخراج شهادة ميلاد جديدة باعتباري ما عندي شهادة، أهه ومن ديك وعيك. شوف أنا أكتب بدون مراجعة لو في خطأ صحح، مش بكري أعطاك الماستر كي.

الطيب شيقوق — 11:58 AM

ود الأقرع اليعقوقابي، حبابك حبابك، جاييك بالمهلة كنت في اجتماع وداخل اجتماع.

الطيب شيقوق — 12:56 PM

اقتباس: بس واحدة كده مطموسة قالت ليهن هوى ما تتكسرن ساكت أسع الوليد بموت.

مبااالغة يا أستاذ ميرغني ههههههههها يطول عمرك ههههها، والله موضوع حياتك كلو سوالف.