وما حب الديار شغفن قلبي… ولكن حب من سكن الديارا

بطاقة التوثيق

عنوان البوست: وما حب الديار شغفن قلبي… ولكن حب من سكن الديارا

الكاتب الأصلي: الطيب شيقوق

تاريخ الافتتاح: 02-07-2007، 06:57 صباحًا

المصدر: سودانيز أونلاين

التصنيف: سفر وونسة سودانية

افتتاحية الطيب شيقوق

الحمد لله عدت إلى مدينة مسقط وعدت إلى المنبر العام، وكلي شوق ولهفة للقائكم إخوتي وأخواتي أعضاء المنبر العام. كنت بالأمس في أبو ظبي، وكانت أحلى وأسعد لحظاتي مع الأخ العزيز ود القبائل «فاروق حامد» الذي ترك كل مهامه الصحفية والأسرية وعلاقاته الاجتماعية المتعمقة في المجتمع الإماراتي ليرافقني — يكرمه الفياض — طيلة فترة تواجدي في أبو ظبي وحتى لحظة إقلاع الطائرة من المطار إلى مدينة مسقط.

أيضًا التحية الخاصة إلى الباشمهندس أبو بكر سيد أحمد الذي كان على اتصال بي على الدوام لحظة إقامتي في الفندق في أبو ظبي. والتحية الخاصة لـ«ود حنا» عضو المنبر العام… وحنا ذاتها يا الفاروق؟

أما «ود المحرب» ففي نار جهنم تأكله من رأسه لكرعيه، وبوريكم السبب بعدين، خلوني أنجم شوية وأرجع لكم. تحياتي لكم إخوتي جميعًا، والشكر لأخينا بكري أبو بكر صانع هذا التواصل الإنساني الجميل.

ود شيقوق

المداخلات والتعليقات

Ahmed Alrayah — 02-07-2007 | 07:36 AM

عودًا حميدًا يا الطيب.

وما حب الديار شغفن قلبي… ولكن حب من سكن الديارا

البيت للشاعر العربي قيس بن الملوح. لم أفهم لماذا أضاف «نون النسوة» للفعل «شغف» وكأنه يقصد الديار المؤنثة لا الحب المذكر؟ يعني لماذا لم يقل: وما حب الديار «شغف» قلبي؟ ولو قال: وما «تلك» الديار شغفن قلبي… لسهل الأمر.

الطيب شيقوق — رد على Ahmed Alrayah

أخي أحمد، شكرًا على مرورك الذي يزيدني شغفًا إليكم. أما استفسارك عن النون، فأنا أتفق معك فيما ذهبت إليه، ولكن دعنا ننتظر المختصين للتعرف على آرائهم حول هذه النون الجميلة الإيقاع.

عادل جبارة — 02-07-2007 | 08:21 AM

ألف حمدًا لله على سلامة الوصول… افتقدناك يا رجل.

abuguta — 02-07-2007 | 08:34 AM

الطيب شيقوق… مرحب بيك وعودًا حميدًا. وكيف لقيت الدندر؟ صاحبك الرطاني بقى يمرح في البورد، يعني في كل بوست… يا له من رطاني مبدع!

محمد إبراهيم «قرض» — 02-07-2007 | 08:44 AM

ألف حمدًا لله على سلامتك… شرفت مسقط ونورتها… وتحياتي عبرك للثنائي فاروق وأبو بكر.

الطيب شيقوق — رد على محمد إبراهيم قرض

أعزائي وأحبائي الإخوة: عادل جبارة، أبو قوته، دكتور قرض. حبابكم عشرة وجيتكم متلهف ومشتاق لكم ولكل الإخوة والأخوات أعضاء المنبر العام. الأخ دكتور قرض طلتك تضفي على المنبر طعمًا ولونًا خاصًا أرجو المداومة. الأخ أبو قوتة جميع الأهل بخير وعافية، بس المجاملات الكثيرة سلت روحهم عديل. لكم مودتي.

خالد المحرب — 02-07-2007 | 10:48 AM

هلا هلا هلا… أولًا الحمد لله على سلامتك. أنا والله تكلوني عشان أجي أقعد في الكرسي الليلة، بس بقيت كويس. مشيت لي فكي قال لي: ساحرك الزول الكان مسافر. قلت ليه: عرفته إن شاء الله. قال لي: السحار اللي يأكله. قلت ليه: طيب العلاج شنو؟ قال لي لازم يرسل ليك شعر من… وتحرقه بتبقى كويس. وثاني قال لي تشيل الصورة. الطيب يا زول حرم حبابك، أنا بعده بقيت كويس طاب… دي دايرة خروف… الشمارات بعدين.

mamkouna — 02-07-2007 | 10:38 AM

أشرقت الأنوار…

الطيب شيقوق — رد على mamkouna

الأخت ممكونة… مشرقة ومنورة بيك يا أميرة.

عبده عبد الحميد جاد الله — 02-07-2007 | 10:52 AM

ود شيقوق… تحية طيبة وعودًا حميدًا، إن شاء الله الجيت منهم بخير.

سمية الحسن طلحة — 02-07-2007 | 11:15 AM

ألف حمد الله على السلامة… مسقط منورة. أبو بكر ما قصر واستحق التابعية، أدانا أخباركم أنت وود النار من طق طق للسلام عليكم. أما ود المحرب يفتش لي تلفونك بين الطش والرش. تقبل سلام الأسرة.

رأفت ميلاد — 02-07-2007 | 11:33 AM

مرحب بيك ود شيقوق، ألف حمد لله بالسلامة. أها راجين أخبارك من طق طق للسلام عليكم ورحمة الله تبارك وتعالى.

أحمد حماد إدريس — 02-07-2007 | 11:41 AM

الدندر صعيد كعب، البزمو لالوبا كثير نبقا تخمو، وكعكولا كبير ينسى الجاهل أمو. كيف كل الأحباب في البردانة؟ عيال شيقوق وعيال البدوي وعيال أبا حميد، وكيف أخبار النعام؟ وكيف عثمان صالح، عثمان إدريس، أحمد ودفع الله، يوسف جبرة، وكيف الصعيد عموم؟ حاولت العثور على أحمد تي في الحج عن طريق عثمان النصري لكن ما لميت فيه، وكيف جدي إسماعيل وابنه مصطفى والأستاذ علي الإمام؟ كيف حاج فاروق ود حامد؟ والتحية لأبو بكر ود سيد أحمد والبطاحين جميعًا وكل بقية الأحباب داخل وخارج البورد… حمد الله على السلامة.

علاء الدين حيمورة — 02-07-2007 | 11:51 AM

ألف حمدًا لله على سلامتك أخي الطيب، افتقدناك كثيرًا لكن وجودك بين الأسرة كان فرحتنا… إن شاء الله تكون خليتهم طيبين وسالمين… ألف مرحب بيك والمنبر نور بوجودك. تحياتي وتحيات ياسر وهبة الله وأمهم مواهب.

فاروق حامد محمد — 02-07-2007 | 07:35 PM

أبو بكر ما قصر واستحق التابعية، أدانا أخباركم أنت وود النار من طق طق لي السلام عليكم.

يا أبا بكر، تالله لم تعهد في الرطانة الفتنة! ألم يدرسوكم زمان في الكتاب إن الفنان بودوه النار؟ هسع لزومه شنو تفتو مع الملكة بت طلحة؟

abubakr «أبو بكر سيد أحمد» — 02-07-2007 | 12:19 PM

أها يا ود شيقوق… ياتو ديار الشغفن قلبك؟ أم بدة وإلا حلتكم وإلا البلكونة وإلا الأوتيل فايف ستار وإلا المطعم إياه الوداك ليهو عم فاروق وإلا القهوة إياها برضو الوداك ليها عم فاروق؟ أنت الحت ما بتشبع منه؟ ومالك ومال ود المحرب؟ يعني بشان يخاف عليك ويتصل بيك أنصاف الليالي بشان يتأكد إنك بخير بعد حفلات الحت؟

أمس طلعت من الشغل الساعة ثمانية ولذا ما اتصلت بيك تاني، وعموما أنت ما كنت فاضي زي ما قال فاروق الفيتو، خاتي رجلينه في موية دافية وملح في قهوة أم عبد الله بتاعة أبو ظبي وبيشتكي لخلق الله من المشاوير معاك والحت. دحين ماشي للشغل وبالليل نشوف حكايتك شنو يا حتات؟

الطيب شيقوق — رد على abubakr

ووووووووب، خلوني أنجم شوية وأتناولكم واحد واحد، إلا ود المحرب أنا محاربو عديل وياريت بالعين التغطس حجره. اتلحني الإجازة كلها ما يتصل إلا وقت الهجعة ونبيح الكلاب وطقطقة عنقريب المخرتة. خلو الرطاني ما يعرفه كمان عشان تكمل رصيد موبايله قبل أفهم منه حاجة. أم أحمد، إنت دحين ود المحرب ده كاسر قيده منك؟

Ahmed Alrayah — 02-08-2007 | 07:20 AM

سلامات مرة أخرى يا الطيب. وجدت هذا السؤال في أحد المنتديات العربية: «ما نوع النون في شغفن؟ هل هي نون نسوة أو نون توكيد؟» وتجد الإجابات عليه في هذا الرابط بموقع الفصيح. عذرًا للخروج عن النص.

سليمان عبد الغني — 02-08-2007 | 07:25 AM

الطيب يا طيب، علك طيب، وحمدًا لله على سلامة وصولك.

Ahmed al Qurashi — 02-08-2007 | 07:42 AM

الأخ العزيز الأستاذ الطيب شيقوق… أهلًا ومرحبًا بك في مسقط وفي المنبر الذي افتقدك كثيرًا، وها نحن في انتظارك لإثراء المنبر بإبداعك وفكرك. أتمنى أن تكون قد تركت الأولاد والأهل بصحة جيدة وعافية.

الطيب شيقوق — رد على أحمد حماد إدريس

أخي ود حماد الحلو، تحياتي وأشواقي. كل الأهل بخير وعافية وبيسألوا منك كثير ومشتاقون لشوفتك، بس الأخ علي الإمام زوجته الأولى بنت عمه توفيت، الرحمة مولاها. والبلد كله مشغول بالمناسبات؛ ده مات نمشي ليه، وده عرس نمشي ليه، ودي ولدت نمشي ليها، وده كراعه اتكسرت نمشي نكفر ليه، وده رحل لبيت جديد نمشي نبارك ليه… وهكذا يا حبيبي، وكلها صرف يدوش الرأس. والبلد يقود حكامها ناس خالد إدريس، ود أم عرديب، ومحمد بشير «البنز» ود السريفة.

الطيب شيقوق — رد على علاء الدين ودكتور أحمد القرشي

إخوتي علاء الدين ود ناس حيمورة، الأخ دكتور أحمد القرشي… تحياتي وأشواقي الحارة وشكرًا لمداخلاتكم الحلوة. كيفكم وكيف عقابكم؟ تهف نفسي لقراءة كتاباتكم. لكما أطيب أمنياتي.

الطيب شيقوق — رد على أبو بكر

ومالك ومال ود المحرب؟ يعني بشان يخاف عليك ويتصل بيك أنصاف الليالي بشان يتأكد إنك بخير بعد حفلات الحت؟

باشمهندس أبو بكر، أنت قابل اتصال ود المحرب الحاسد ده اتصال محنة؟ وتقصد شنو أنت يا بكري بقولك «بعد حفلات الحت»؟ أيوه فهمتك بالحيل، أنت بتقصد بعد لعب أم العتينوبة أو حرت ولا شنو؟ راجع الفاروق ود حامد وود المحرب للشرح، ولكن فقط في حدود ما تحويه من معان ظاهرة، وإلا يتعمقا في تورياتها حتى لا يخلا بنبل المقاصد. لك معزتي.

سارة حمزة — 02-08-2007 | 09:00 AM

ألف حمدًا لله على سلامة الوصول.

حيدر حسن ميرغني — 02-08-2007 | 09:35 AM

الحمد لله عدت إلى مدينة مسقط.

ما عدت… لكن عادت بك الأسباب. ألم يقل الشاعر:

ألم تر أن الله قال لمريم *** وهزي إليك الجذع يساقط الرطب

>

ولو شاء أن تجنيه من غير هزة *** جنته ولكن كل رزق له سبب

لي شقيقة بتلك الربوع، أسأل الله أن يجعلها لكم ولها أعظم بركة من نخلة مريم.

أنعام عبد الحفيظ — 02-08-2007 | 09:36 AM

الطيب شيقوق… حمدًا لله على سلامتك.

الطيب شيقوق — رد على حيدر وسارة وأنعام

الأخ حيدر، الأخت سارة حمزة، الأخت أنعام عبد الحفيظ… يملأني شوق إلى كتاباتكم الجميلة. الأخ حيدر، نعم عادت بي الأسباب ونأمل أن يكون في العودة الخير والبركة.

abubakr — 02-08-2007 | 09:51 AM

باشمهندس أبو بكر، أنت قابل اتصال ود المحرب الحاسد ده اتصال محنة؟

يعني لو ما محنة يصرف ريالات وهللات ويسهر الليالي لحد ما الخط يشبك؟ يعني أنت عندك شنو ممكن يلقاه عندك من مكالمة هاتفية بتلفون لسه ما جيل ثالث 3G؟

راجع الفاروق ود حامد وود المحرب للشرح، ولكن فقط في حدود ما تحويه من معان ظاهرة.

أنا بتاع المعاني الظاهرة فقط، لأن العربي الدرسوني ليهو أصعب جملة فيه زي ما قلت زمان «ظلع الجمل». فبالله خبر العراريب والعرريبات كلهن هنا أنو يلتزموا بلغة تراعي حال العبد لله، وإلا فسوف أتعلم صيني وأصلو هم أضعاف أضعاف البتكلموا عربي عاملينا زحمة ساي، وأقولكم جاو Chao.

لك معزتي.

أنا فيجي، نباتي Veggie، وعندي حساسية ضد الدايري برودكتس Dairy products.

الطيب شيقوق — رد على abubakr

ويقيني أنك بندري لم تكن بدويًا مثلنا مهتمًا فيما إذا كان ذلك الجمل أصهب أو بشاري؟

خالد المحرب — 02-08-2007 | 11:27 AM

صباح الخير يا حلوين. أنا شايفكم أنت وأبو بكر دايرين تتشكلوا. والله بيني وبينك دي أنا دايرها، لأن الرطاني باعني بعد أنت ما جيت، قال الترجمة بتاعتي دايرة ترجمة. رغم أنو راجل حقاني، لكن تشوف نهاية العراك ده حدو وين. بعدها ممكن أقبل أكون مترجم. أنت الراجل بقى في معيتنا صعب تهميشو.

الطيب شيقوق — رد على خالد المحرب

هي المسألة يا ود المحرب بقت مش تهميش أو غير تهميش، الراجل نحن ذاتنا أدمنّاه زي إدمانك أنت لدمشق وقاصرينا. وهو عارف بقى معانا زي خازوق أمكنة الودّر زمنا، وكان شالوه ما بنشال وكان خلوه خرب الدار!

معتصم عبد الرحيم — 02-08-2007 | 11:42 AM

العزيز الطيب شيقوق، طائر الدندر المغرد… حمدًا على السلامة والجيت منهم؛ أهل التكميري، الدقاق، أهل الكرم اللامحدود. على وزن الحسين: لك قوسيبة مودة خاصة. معتصم العربي.

abubakr — 02-09-2007 | 11:02 AM

أولًا يا ود شيقوق هو «جمل ظلع»، يعني حالة مرضية… ما قالوا لينا «جمل بلع» بشان الواحد يعرف أنو في جمال بحالة صحية تسمح لهم بالبلع وبعدين نشوف أوصافهم الباقية. ود المحرب حول الموضوع لما شاف العريب قريبه فارش حجباته وعامل حولية للفاروق.

وبعدين أنتم نضم العراريب ده ما عنده آخر، كل مرة تزيدوا كلمة. أهو آخر واحد جاي بطائر النرد، يعني النرد بتاع الطاولة كمان بيطير! والتكميري دي أكيد كلمة مستعارة… آخر كلمة فيها «تك» كانت تكل، متين كبرتوها؟

خالد المحرب — 02-09-2007 | 11:40 AM

أبو بكر، والله أنا ذاتي ما عرفتها التكميري، لكن الظاهر إنها Local على الضيق. الطيب صاحبك البارح انتقمت منه بالليل، كان الوقت زمان هو ولكن اختلف المكان، لقيت المسكين في سابع نومه كعادته. ما تسمع الكتب قال… عرس الزين.

فاروق حامد محمد — 02-09-2007 | 11:54 AM

أها يا الطيب… ود حنا حاله عال! عقبال حنا.

Muna Khugali «منى خوجلي» — 02-09-2007 | 01:34 PM

رجوع سعيد بإذن الله… مرحب ود شيقوق.

abubakr — 02-09-2007 | 06:25 PM

رجوع سعيد بإذن الله… مرحب ود شيقوق.

يا بت يا منى… تختي ليه وردة بيضاء، زي اسم أول فيلم مصري، ليه؟ وأنت ما عارفة شن سوي في الإجازة؟ ده كان تختي ليه عشر… خالد المحرب.

خالد المحرب — 02-10-2007 | 10:07 AM

المسكين الشيقوق جاء من السودان مفلس من كله. وين اللاب توب؟ المكتب ده ما بيحل المشكلة، لازم التواصل من البيت. نديك 24 ساعة تحل المشكلة. أبو بكر شوف صاحبك بلاهي نائم على طول الخط، يا ربي مالو؟ سؤال داير إجابة من أبو بكر.

abubakr — 02-10-2007 | 10:19 AM

أها يا ود المحرب… أبو بكر هو الكان فاتح معاه خط ساخن قريب لشهرين؟ أها زولك بعد الخط الساخن ما قابل إلا الفاروق، ومشى معاه بكانات، تاني يوم فاروق لقيته خاتي رجلينه في موية دافية وملح في قهوة أم عبد الله الظبيانية يلعن حظه. بدل الملاوعة أنت والفاروق شوفوا سويتو ليه شنو. دحين أرقام تلفوناته معاي وبعدين أجر خط، تجوا أنتم كلكم واقعيين؟

فاروق حامد محمد — 02-10-2007 | 10:56 AM

وما حب الديار شغفن قلبي ولكن حب من سكن الديارا.

عن أي ديار تتحدث يا أخا العرب؟ ديار العرب أم ديار «العجم»؟

الطيب شيقوق — 02-10-2007 | 11:02 AM

أهل التكميري… الدقاق… أهل الكرم اللامحدود.

أهلين معتصم عبد الرحيم، أنت جاي من وين البتعرف التكميري والدقاق؟ كلامك عسل يفوح من عنبريب دنادرنا، فيه بركة الأبيضاب وروحانية الشيخ أبي قراقيب. فيه تقيع القربة المدبوغة بالكتاب الناعم، وفيه عوعاي الهم عند العصرية وقت أمه تجيه جارية من السرحة.

دحين ابقى عشرة على إخوانا الفاروق وأبي بكر وود المحرب جميل المحيا والحلو حلاة. الله يكفيك شر قال الحلو حلاة يا أم أحمد، الزول كسريه بمصاريف الطلبة وكسريه بكارفور وكسريه بعنب الرياض وتياب البطحة، والباقي الما بيتاكل أديه الزبالة بذارًا لقروش ود المحرب الحلو حلاة. وكان غلبت أم غلاب أديني فيه سحبة خليني أسجمه ليك؛ فكي قوني والله كتابته اكان أم دلدم ختت ما بتخت. فكي قوني يجاوز الحجاب بشحم الورل وزيت السحلية، وده الخلاني ما أشوف في الدنيا غير أم عبد الله، السمحة أم ولدي.

الطيب شيقوق — 02-10-2007 | 11:41 AM

أبو بكر والله أنا ذاتي ما عرفتها التكميري لكن الظاهر إنها Local على الضيق.

يا ود المحرب، ويا الفاروق، ويا أبا بكر، ويا زينين ويا حلوين… ارموا بالكم لكلامي ده كويس: التكميري دي قرية من قرى شرق نهر الدندر وفيها الشيخ الصالح مولانا أبو قراقيب، وحتماً حتكون بانتيو الشمال وفلج الشمال وأبا جابرة الشمال. استمر التنقيب عن النفط في منطقة الدندر من أيام شفرون، وبعد مغادرة شفرون أتت شركات ماليزية للتنقيب في منطقة الدندر مربع 8، وهذا المربع يشمل جميع المنطقة الواقعة شرق النيل الأزرق. وأول بئر نفطية تم حفرها في قرية التكميري، حيث وجدت كميات مهولة من النفط سيبدأ ضخه في خلال الأشهر القادمة، وحتكون قرية التكميري في كركوك وسيبيريا وبحر الشمال وبحر قزوين وكمان الخبر. هنالك آبار أخرى في نفس المنطقة واقعة في قرية نجم الدين وقرية حدية، وكلها من قرى نهر الدندر. أنا بفتش لي في عقال الأيام دي، اعملوا حسابكم.

الطيب شيقوق — 02-10-2007 | 11:42 AM

عن أي ديار تتحدث يا أخا العرب؟ ديار العرب أم ديار العجم؟

الفاروق أخوي… دحين في ديار أطيب من ديار حلوية؟

الطيب شيقوق — 02-10-2007 | 11:54 AM

المسكين الشيقوق جاء من السودان مفلس من كله، وين اللاب توب؟

ود المحرب، أنا حرم ماني بسافر بقفل التلفون. حرم طالقه صدقة ساي والجماعة يصوطوا ساي لحدي ما مشوه على عجل الحديد، لكن بيرجع، اصبروا.

abubakr — 02-10-2007 | 01:34 PM

ود شيقوق… أها صحيت من نومتك؟ أنت كنت بتسوي شنو في الإجازة؟ باقي لي اتهلكت تب… دوب وصلت مسقط ورحت نائم، وود المحرب مشغول عليك ليل نهار وأنت نائم. دحين صحيت على ريحة بترول التكميري.

أنا زعلان على التكميري وأهلها الطيبين. ما في مكان طلع فيه بترول إلا ناسه أول من عانت، قصص شل في نيجيريا ووو. بس التكميري بلد فقراء وصالحين مثل ما قلت، والله بيحميهم.

أها نرجع لحكايتك مع الفاروق ومقيلكم في الديسكو… أها قول شن سويتو لحد ما الفاروق رجلينه اتورمن من… يا خاين، قول أي حاجة!

ببيان bayan — 02-10-2007 | 06:25 PM

ود شيقوق، ألف حمد الله على السلامة. بعودتك يعود للبورد ألق خاص لرجل يحمل نكهات بلادي. تحياتي للزوجة وسعيدة برؤيتك.

خالد المحرب — 02-12-2007 | 11:41 AM

وجدت كميات مهولة من النفط سيبدأ ضخه في خلال الأشهر القادمة.

يعني نجهز مكتب داخل القصر الجمهوري للسيد مستشار رئيس الجمهورية «الطيب شيقوق» حتى ينضم إلى ركب المستشارين الكثار ديل، لكي يناقش تقسيم الثروة والسلطة لأهالي الدندر.

والله بختك يا ود المحرب، وكمان أبو بكر وحفيد النار، بقى عندنا زول في الحكومة وكمان جو الجك.

الطيب شيقوق — 02-12-2007 | 11:42 AM

بقى عندنا زول في الحكومة.

ود المحرب ما تلخبط يا أخوي. كلامك ده زي البدق عطر منشم بيني والفاروق. أنا حاشاي اللمة على الحكومة يا أبا أحمد، والكلام ده لو سمعه الفاروق تاني حرم سلام ما يسلم علي.

أم منشم دي امرأة كانت في الجاهلية بتعمل عطرها وترش بيه القبائل المتناحرة عشان تولع النار بينهم. وعندنا في البطانة يقول ليك: «اقلب النعال عشان الشكلة تولع زيادة». عندنا عمنا متزوج مرتين وطوالي بيتشاكلن مع بعض، وهو أصلًا ما يقوم من ثيابه وقت الشكلة، بعاين ساي ويضحك ويقلب ليهن النعال عشان يتمعطن شديد. دحين بيني والفاروق ما تقلب النعال، الزول ده أنا حاري منه كثير.

ختام البوست

نهاية البوست والأرشفة المنقولة.